Mediapart zo ul load keleier war internet. Kelaouiñ enklask a reont, mont da glask traoù estlammus (pouezus ?) dilezet, sañset, gant ar mediaoù boutin.
Evit lenn o skridoù war al load eo ret talañ, neuze ne lennan nemet an titloù bras. Koumanantet on bet d’ ul load all, Arrêt sur image (Drafad), ha dipitet. E-keñver furm ha dodennoù ne oa ket pell diouzh ar wask henvoazel. Lod brasañ an dud a emelle er foromoù a oa ganto stuzegezh an holl lennerion deboner, azeulerion ur skipailh ken brav, ken oberiant, ken soutil.

Ar mediaoù-se zo warno an hevelep rediezhoù hag ar mediaoù henvoazel : gwerzhañ, dastum arc’hant a-walc’h evit padout, ha marteze ober buzadoù. Da heul e kouezhont en hevelep furmoù kelaouiñ. N ‘eo ket kelaouiñ, diskuliañ, dezrannañ o ober pennañ, hogen gwerzhañ keleier. Da zont a-benn e rankont leurennañ o labour da zedennañ arvalion-arvesterion.

Setu titloù war Mediapart :
Syrie : le parlement français sera-t-il le seul à ne pas voter ? (Siria : hag e vo an dael c’hall an hini nemeti da na vouezhiañ ? Bettencourt : les juges se paient les journalistes et le majordome (Bettencourt : ar vreutaerion en em brof ar gazetennerion hag ar mestr-a-di (meur a ster a c’hell bezañ da «se paient»)). An daou dalbenn zo amjestr a-walc’h ha skogus da higennañ an arval.
Hag emeur war hent ar c’helaouiñ avat ? Furm moederezh ar varc’hadourion keleier henvoazel o deus, ha kempoell eo gant klask gwerzh d’ o labour.

Trouz o deus graet en dro d’ an afer Bettencourt da skouer.
Lennet ‘m eus gant ur gazetennerez eus Le monde he doa nac’het plediñ gant ar stlenn kaset dezhi gant ar breutaer perzhiat er prosez en doa da heul e gaset da Mediapart. Tud Mediapart o deus goapaet ar gazetennerez p ‘he doa c’hwitet ober un taol gant an taol.
Ar gazetennerez a zisplege he doa nac’het ar c’hinnig peogwir e oa skuizh gant ar vreutaerion a arvere ar wask evit adluskañ ur prosez sac’het.
Klevet ‘m eus nevez ‘zo e tremenfe dirak al lezvarn ar mestr-a-di en doa stenwezet pezh a lavare an dud e ti e implijerez, hag ivez ar gazetennerion o doa brudet dielloù a selle ouzh buhez prevez an dud. N’ eus ket anv, ur souezh, da varn ar breutaer en doa roet d’ar wask ar stenwezadurioù evit kas war-raok e labour.

Pegoulz e ray ar gazetennerion un enklask a-zivout an dud a lezenn a arver ar gazetennerion da zisac’hañ o frosezioù, ha war al levezon a zo bet gant seurt doareoù war emdroadur ar wask ?
An aferioù-se n’ int ket bet lusket war intrudu kazetennerion, hogen gant ar vreutaerion war glask adluskañ o frosezioù.
Ar gazetennerion a leurenn o c’helaouiñ enklask war batrom an handerc’hadoù amerikan. Padal ne glaskont ket kelaouiñ war arc’hwelioù arvarus ar gevredigezh hogen gwerzhañ tudenn an enklasker kalonek.
Un enklask o c’hasfe da ziskuliañ disterded an taolioù ha da deurel gouloù war un degouezh boutin hag arzaeladus : an dud o deus ar galloud ne sentont ket ouzh al lezennoù, hag unan ken boutin all : ar vreutaerion a arver ar gazetennerion.
Padal ne oar ar gelaouennerion nemet embann un heuliad istorioù kantet d’ un hinienn a zuont, mont a-du gant kadouriezh ar vreutaerion, hag emleurennañ e kelaouennerion enklask…

Politikerion, kazetennerion a genderc’h an un arvest. C’hoari a reont, dezerc’hañ tudennoù kazetenner pe bolitikour. N’int ket dremmourion hogen ganniaded, dezerc’hourion dister o micher en un arvest marc’had mat giz skinwel beziadoù.

E-keit-se e labour an dud wirion, tud a vicher, stuziet, pell diouzh ar rakleur ma tifret seurt ganniaded da leuniañ goullo ar bed dister ma vevomp ni, kaeliet.

Load Mediapart ha load Arrêt sur image

Ar marv ne dalvez nemet dre an niver, al leurennañ hag an daranverezh.

Ar gevredigezh ma vevomp a lazh tud bemdez evit lakaat he stuzegezh da dalvezout, da ren, da badout. Marv gwerc’hek pe varv kevredigezhel, denel.
Seurt lazhadeg n’eo morse dezrannet evit ar pezh ez eo, eleze gweredoù un argerzh, hogen e stumm un heuliad dargouezhioù, hep liamm kenetrezo, e rann ar c’helachoù.
Pep darvoud zo kinniget evel ur gwallzarvoud, un dargouezh strizh, lec’hel, keit ma ne dalvez ket d’ an abadenn veur. Ar c’helanoù na dalvezont ket da skorañ ar penndudennoù a chom en amleur. N’eo ket bet arvestekaet distruj pobladoù Suafrika pe Palestinia da skouer.

Pa grog un darvoud da vezañ brudet eo peogwir e c’hoarvez en ul lec’h gant perzhioù milourel, politikel pe armerzhel, spletus d’ar stuzegezh kornogat. Kregiñ a ra neuze an arvest kañvaouus, koroll an Ankoù. Er mare-mañ e Norzafrika hag er Reter Nesañ e lakaer pouez war ar reustloù, al lazhadegoù, ha kinniget eo an apokalips nevez war don un dezerc’hañ gourdramaek ha kentelius.
An dud o deus ur pouez war ar c’hedveno, eleze ar re a zalc’h an araezioù kehentiñ yoc’hek, kazetennerion, politikerion, kellidourion, a ren war an arvest.
N’ anavezomp nemet o labour war ar c’hedveno kornogat. Ne ouzomp ket kalz eus o labour war dedroadur an darvoudoù er broioù tizhet pe war levezon o leurennañ war gresk ar feulster.

Da belec’h e kas distruj kevredigezhioù arallstuz ? War verrdermen e tegas frankizekadur barregezhioù kellidel galloudus. Danvezioù krai a vo degaset war an nevid. Distruj hag adsevel a genderc’h helv. An abadenn sirk a fura ar yoc’hoù kornogat ivez, pep hinienn oc’h emhevelebiñ en un doare trivliadel kenañ ouzh hini pe hini eus tudennoù an arvest gronnet e bevennoù ul leurenn.

Gant arvezioù denel kemplezh e c’hoarier avat. Klask merañ ar bev eo, fardañ ur ouenn dud hep youl, hep preder, loened.
Stuzegezh dalc’herion ur bed unventekaet, dre glask kaout pep galloud war bobladoù o doa c’hoazh un tamm stuzegezh piaouel digor war ar seveniñ, a genderc’h dic’hoanag, feulster, hag o enteuzadur en ur yoc’h distuz ha sentus.
An arvar zo kenderc’hañ ur bagad loened gouez diveradus, ha, distruj an denelezh.

Diorreadur ar c’halvezouriezhoù hag an armerzh a oa barrek da zigeriñ spered an dud, da astenn dezho binvioù denelaat. Al leurennerion veur ne emellont er c’hoari nemet dre zegas binvioù feulster ha distruj, dre freuzañ ar stuzegezhioù, ar c’hevredigezhioù. Skorañ a reont metaouioù ar broioù all a glask mestroniañ o fobladoù. Ledañ feulster o stuzegezh kornogat a reont, ha lakaat en arvar an denelezh. Pa zifloup diouto ar c’hoskor o doa skoret, ne ouzont nemet kas pelloc’h an distruj dre c’henel ur ouenn servijourion nevez ha tizhout ul live all er feulster hag en dizenelaat.

An doare arvestek meurdezus ma leurennont ar marv, en o labour, en o c’helaouiñ, e dezerc’hañ o fleustradegoù arzel, a ziskouez a-walc’h pegement e vourront gant o micher.
Staliet int evit kantvedoù c’hoazh, betek m’ o devo distrujet pep stuzegezh, pep arvar a zenelezh.

Petra a vije ar bed hiziv m’o dije ledet binvioù denelaat e-lec’h ledañ kealiadurezhioù yoc’hekaat hag armoù gwaskañ ha distrujañ ?