Trouzal a a ra an dud e Breizh. Huchal a reont. Hag evit dedennañ evezh an hini a stard o gouzoug eo ? Ha piv o gwask, pe betra ?
Ha n’ eo ket risklus mont da c’houlenn an aotre da vevañ ouzh an hini en deus pep galloud warnoc’h ?
Hag goulenn a ra ar vuoc’h ouzh ar c’higer na vezañ lazhet ? Ha goulenn a ra ar baraer digant ar mañsoner binvioù d’ ober e vara ? Ar c’higer a ra e vicher. D’ar baraer da sevel binvioù d’ ober bara.

Kletoc’h eo bevañ en hunvre ha kemer plijadur, eget kregiñ gant penn bihanañ ar pezh a heter.
Kletoc’h eo tamall d’an all ar pezh na vezer ket barrek d’ober.
D’an dud a venn eo kregiñ da sevel o bed. Ne vo skoazell ebet digant an hini a zo mat ar bed evitañ.

Kejet ‘m eus er bloavezhioù seikont gant tud o doa boulc’het gant ur bed a glote ganto.
Ul labour diaes e oa, diaes evidon, diaes evito.
D’ar mare-se, ne oan netra er gevredigezh c’hall kenkoulz ha hiziv.
Desket ‘m eus e oa gounidusoc’h ober eget leñvañ, pinvidikausoc’h ober eget goulenn.
Pezh a vank d’ hon denelezh ne c’hell ket bezañ roet pe gemeret. Da sevel eo.
Kement tra a zo er bed a ra ar bed evel m’ emañ hepmuiken.

Diaes e oa evel just sevel pezh na oa ket. Ken diaes all e oa evidon e traoñ mik urzhaz a ‘r gevredigezh c’hall hag evit ar re a oa uheloc’h o live. Bez hor boa da sevel darempredoù nevez. Ne oa ket mui a-walc’h din gortoz e vefe lavaret petra ober ha ne oa ket mui a-walc’h dezho bezañ ar re a ziviz.
Pouez ar bed evel ma oa, hini ar gevredigezh c’hall, ar stuzegezh c’hall, a oa war hon divskoaz. Ar bed a vennemp krouiñ a oa ur samm ouzhpenn hon lakae en arvar da risklañ e sodelloù ar bed kozh a chome hon pemdez evel ma chome pemdez an holl dud.
Binvioù nevez a oa da grouiñ bemdez, ha mar sellit ouzh brezhoneg ar prantad-se e verzhot un adsked eus al labour graet. N’eo ket bet kaset ar brezhoneg war-raok evit skoazellañ an dud da vont war-raok. Peogwir ez ae an dud war-raok eo aet ar brezhoneg war-raok.

Ne oa ket an dud treuzwisket e Brezhoned. Ne glaskent ket un asant bennak d’un neuz breizhek bennak danzeet gant poblañs ur bed ma ne oa keal ebet eus denelezh evit un den brezhon.
Emsaverion vrezhon edont peogwir ez ensammet krouiñ ar remziadoù kent en o labour, remziadoù tud rez o doa degaset denelezh ha kaerded er bed.
Aet da get ar framm ma veze arnodet ur bed kaeroc’h, dindan sammad ul labour divent ha dedroadur al labour-se, eo distro an holl d’ar gevredigezh hon distruj, a sun hon denelezh d’ober ac’hanomp hiniennoù beuzet en ur yoc’h gouzañvat ha diijin.
N’eo ket ar Vrezhoned a zistrujer hogen denelezh tud sujet. Mestroniañ zo distrujañ denelezh an den.
N’ eo ket treuzwiskañ e Brezhoned mojennek, argelek, a zegaso denelezh en-dro.
An holl dud veuzet er yoc’hoù a liv o dremm e liv pe liv gant keuz d’ o denelezh kollet, evel chatal o vont d’ al lazhdi, pep hinienn lorc’h ennañ gant e liv.
Ar yoc’hoù ne ouzont nemet ober trouz ha goulenn lezennoù nevez da sentiñ outo. Ar pobloù a gas war-raok o buhezañ.
N’eo ket aes avat diskregiñ diouzh ar vakañsoù, diouzh ar festoù, diouzh ar pochadoù, a ra d’ ar sujidi gouzañv ar bed-mañ, daoust d’ar genou poazh.

Gouelioù meurlarjez a roe tro da boblañsoù ar grennamzer da c’houzañv o femdez. Hiziv, gant an diskeladegoù hag internet eo aet meurlarjez da bemdeziek.
Arc’hañ, choual, klemm, n’eo ket sevel.

Emaomp er vro o tremen eus ur c’hevread levraouegoù, ha mediaouegoù, d’ur vediaoueg kevreet, eus rouedad levraouegoù ar c’humunioù d’ur vediaoueg eus kumuniezh ar c’humunioù, ar gumkum.
Diouzh un tu e tegas koskor perzhek, lakaat a ra e diraez holl annezidi ar c’hanton hollad an dielloù a zo e pep levraoueg.
Diouzh un tu all e pella an dud en abeg d’ ur mererezh ponner ha kreizennet.
Un den a ziviz evit an holl ha dedalvezet e vo patromoù dizanv a zo pell eus gwerc’helezh ar c’humunioù, reoù un den stummet e skolioù ar Stad pe er skolioù meret gant ar strolloù kellidel.
Dedalvezet e vo diwar neuze kalvezderioù un rener stummet hervez un damkaniezh e dalc’h ar gealiadurezh trec’h.

Diwar vont, ul levraouegerez a-vicher nevez degouezhet zo he moumoun al lennadeg, ar renerez ivez. Neuze e klaskont lakaat an holl dud dindan o galloud da bleustriñ al lennadeg.
Diwar-c’horre eo ar stummadur o deus bet avat. Lenn, pe lenn ha c’hoari, pezh a glask ober hon levraouegez, a c’houlenn ur stummadur perzhek war ar c’hoariva hag ur stummadur arbennik war al lennadeg.
Ar stummadurioù berr roet zo darnel ha ne reont ket d’ un den bezañ barrek da ren war ur stroll lennerion. Deur pennañ ur seurt stummadur zo degas arc’hant d’ar stummerion.
Lenn dirak an dud, evel sorbiennañ, c’hoari, a empleg ur pleustr pemdeziek evit bezañ emouiziek ouzh ar pezh a reer.

An dud n’o deus ket bet ur stummadur bastus a ra traoù evel hinienn, evit bezañ gwelet gant an dud, ha n’eo ket evit lakaat da dremen endalc’had an oberenn lennet.
Dezerc’hañ a reont ul lenner evel ma tezerc’h reoù all ur sorbiennour.
Emeur en ur bed faos, ur vuhez leurennet ma n’ eo ket ar pezh a reer a dalvez hogen ar pezh a roer da welout. N’eus ket rec’hoari en devoud hogen falsc’hoari.
An dud war al leurenn zo o tezerc’hañ tud war al leurenn, n’eo ket war al leurenn ez int faos, hogen a-hed o buhez. Sellit pegen brav on ! O micher den o deus disoñjet ha pep ober zo evito un dezerc’hañ.

Ar renerez a c’hoari roll ar renerez evel m’eo bet kelennet dezhi.
Lavarout a ra klask bezañ tost ouzh an dud, gortoz diganto kinnigoù. He evezhiadennoù war ar pezh a ginnig an dud zo bepred yael hogen dispis, ha da glozañ ar breud e lavar e vo graet diouzh he diviz peogwir eo suroc’h… Da dostaat eo ouzh an droienn bobl : lavarit dimp eus petra hoc’h eus ezhomm hag e kelennimp deoc’h e zioueriñ.
Penn mererezh ur benveg he deus kemeret. Ne ra forzh gant an dud. Dont a ra gant he remzad, he diplomoù, lavarout a ra te da dud n’ he deus ket diwallet ar saout ganto, hogen n’o gwel ket. Ne zesko ket kalz traoù diganto peogwir e oar pep tra. Dafar int evit an den nemetañ er framm ez eo hi dre berzh he stummadur.
Tu zo da gompren seurt emzalc’h a venn bezañ efedus, a vicher, padal mar sellan ouzh an dekvloaziadoù o paouez tremen e c’hellan lavarout ne gas da neblec’h nemet da vastañ da gletadurezh un nebeut hiniennoù pignet en un tren diroll.

Petra ober neuze ? Tec’hout ? Emlazhañ ? Kenderc’hel gant ar vuhez, zoken mar laka seurt tud da c’hoarzhin.

Trenk, c’hwerv ?
Pa vezer bepred o pismigañ war ar pezh a zo degemeret gant an holl e teuer d’ emc’houlenn ha ne vezer ket un tamm gant ur spered a-dreuz. Pa c’hoarvez klevout tud o vont a-du gant hoc’h arvarioù ez eus peadra da vezañ enkrezet un tamm.
Perak e ran ar pezh a ran ? Perak ne fell ket din mont da heul gizioù ar re all ? Perak ne zeuan ket a-benn da gompren penaos ez arc’hwelont ?
Perak na zont a-benn da lavarout trugarez da dud ‘zo, nemet evit bezañ seven ? Perak na zont a-benn da lavarout da dud all va soñj war ar pezh a reont ?

Trugarez a lavaran da dud a genlabouran ganto, ha va soñj a lavaran d’an dud a labouran a-walc’h ganto evit kaout an amzer ha binvioù boutin d’ e ober.

A-wechoù lavarout e soñj zo lakaat un termen d’ ul labour, d’ un darempred gant tud e oa dudius labourat ganto, dudius o daremprediñ.
Bepred e choman en arvar. Bepred an dibaboù zo tidek daoust d’ar c’hoant bezañ poellek. Bepred ‘m bo keuz d’un dra bennak.
Dibab, ya, hogen penaos ? Aesoc’h eo pa vezer en un ober politikaet, en un ober a zo en e amgant ar geoded. En ur bed bruzhunet, aet da hiniennoù, e teu da vezañ diaesoc’h.
N’eus nemet d’ ober, hep tremened, hep dazont.

Ha kement-se a felle din ? Nann.
Neuze e choman da sellout ouzh an dud a dremen, a red a bep tu. Gwazh a se mar tamallont din na gemer perzh en ur fest a gavan trist. Da bep hini e blijadur diouzh ar pezh a c’hell.

Va barregezhioù zo bihan hogen kevret gant barregezhioù ar re all int dereat o ment.