Ar c’hreunenn a ziskar ar vuhez,
maen-touch ar c’hastell traezh,
frailhig er stank a zifardell,
a sach war e lerc’h kement greunenn ‘zo.
Taolet d’ ar bern ar c’hozh benveg a oa diouzh an dorn.
War ar bern teil ar vleunienn disec’het.
Skrapet diseblant ar pezh moneiz uzet.
Dister e oant,
netraigoù.
Diziouerus d’an tonkad
ez hañvalent bezañ.
Dic’hoanag,
un troc’h er vuhez.
Daou damm an neudenn o vont gant an avel,
aner klask o adskoulmañ,
aner klask merzhout penn un tremened laeret.
Hiziv e krog un tremened nevez.
Foei war an hiraezh,
bec’h d’ an eñvorennoù,
troc’het ur brec’h,
e c’haner mogn d’ ar vuhez.
Unan en e gorn a c’hoarzh glas,
dister an teñzor, dister ar preizh,
didalvez d’ e vuhez diampart.
Laer disked.
Lazhet un tamm eus an den eo ret mat genel a-nevez,
nevez ha kozh war un dro.
Dargouezh iskis e vlaz.
Na glask ar roudoù eus ar pezh a zo bet,
er pred emañ klok ar boud,
er vuhez,
en ober,
er bed.
A-dal d’ ar feller disouezhet
ne c’hell an den nemet goanagiñ
e kan ar mousc’hoarzhoù,
diougan un denelezh divarvel.
