Neved, azeuldi e goudor pileroù betoñs, riboul gourhent ma red trepasoù puilh ha strizh etre marc’hadourezhioù berniet a vil vern dindan un neñv a-ispilh outañ koroll ar c’hameraoù hag an uhelgomzerioù, pell-pell a-us d’ ar pennoù. An dud a ya a bep tu da vagañ o feiz landreant ha prim, evezhiet gant morianed lufrus o fennoù moal ha gant millagadoù ar stlenneg, a-unanoù pe a-diegezhioù, bepred digenvez en ec’honder goullo skedus, marmor ha gwer ha livioù flamm, warno sonerezhioù dispan, dister, disked, ha mouezhioù, ha hopadennoù dianav, dizanv, ha tarav kammedoù skuizh ha ruilhadennoù karrigennoù.

A-hed an deiz, paket e las ar voest c’houllo safarus da c’hounit o zamm greun, e tro gward ar c’hefiourezed linennet war an aridennad kefioù betek an dremmwel. Mousc’hoarzhus, hegarat, seven, takennoù denelezh en aloubidigezh an dizenelaat reizhiadek e gourc’hemenn un doue marlonk e kompezont an aon a sav ennon peuzloen kollet er beurevezh nevez. An iskrouadur ac’hanon, digenvez, dic’hoanag, kenderc’het evel milionoù all war an tamm douar-mañ gant yoc’hekaat vil ar gwerinelezhioù beveziñ, a adkav en o mousc’hoarzh, er gerioù eskemmet, un tamm fiziañs en dazont.

Er stroll merc’hed yaouank staliet ouzh an daol nes ez eus unan. N’ eo ket koant. Kaer eo, eus ar seurt kened diamzer.
E dremm zo taer ha flour. He blev damhir o deus stummoù fiñvus a ro nerzh sioul ha buhez dezhi. He mousc’hoarzh zo ledan hag uvel, un dremmwel steuzidik.
Ma n’ he dije ket sellet diouzh va zu ne ‘m bije ket taolet evezh outi.
Skañv e oa sellad he daoulagad glas glizin. Nijet eo kuit pa ‘m eus sellet outi evel ur valafenn o vont a vleunienn da vleunienn.
Tañva a ra ar blijadur a vezañ gant he mignonezed ha arvestiñ ouzh an dud er c’hafedi.
Sioul eo e-mesk fistilh he c’homerezed na baouezont ket un eilenn a gomz hag a c’hoarzhin, ul loa-zour o splannañ war c’horre gwagennek ul lenn vras dindan an avel veure.
Na yaouank eo ha koulskoude leun-klok gant peurgened ar bed, tremened ha dazont.
Ouzh he gwelout e teuer da soñjal ez eo ar gened hennad ar bed arvestet pa ‘z eo dister pezh a arvester eus ar bed.
Deberzh edon aze. Talañ a ris va banne ha kuit, o kas ganin ur banne kened kompez e bro an dalled.

Ra vo meulet Doue evit ar pezh n’ en deus ket graet, mousc’hoarzh ar plac’h he lagad birvidik, kelc’hioù nijadenn ar c’hwibon en oabl ur valeadenn, bleunioù nevez ar sitrouilhez bep beure en ur morad glasvez, kement darvoud eskoret eus hon selloù war ar bed, hon gwezhiañ, dargouezhioù pinvidikaus. Ra vo meulet Doue a vezañ lezet ganimp, tud vunut, ul lec’h ken bras er c’hrouiñ.