Ar glav a gouezh a-bilh war ar vered vras kollet e-kreiz ur bannlev dianav.
Kilometradoù graet gant ar c’harr ar fri war ar GPS.
Sipet ar spered hag ar c’horf gant an hentred. Eurvezhioù gant an daoulagad war an hent, ha tizh bras.
Difoupet omp eus ar gourhent. Tapet en engroez stank ha gorrek.
Ar gêr, bepred ar gêr. Divent. Straedoù eeun diziwezh. Hentoù peder forzh chouket warno miliadoù a girri oc’h ober o zoull e-mesk savadurioù dizanv a-viliadoù.
Chom a sav, loc’hañ, chom a sav, loc’hañ. Gludet er morad karrbedoù. Luc’hed ar gezeg-tan en em sil en dolzenn, preñved o c’hwiliañ en un tamm kig brein.

Nebeut a dud e-barzh an iliz. Yen, strizh, gennet e skej daou straed.
Ur beleg fichet mat en e borpant. E vouezh skiltr ha gwan a zibun gerioù dibouez.
Kanaouennoù gallek boas al lidoù kañv. An ograoù dientan, dister.
An ezmaer proprik a veul gwazh an hini varvet gant jourdoul ha fent, penaos en doa graet eus ar gumun ur greizenn vroadel pouezus a genstrivadegoù kezeg-houarn, penaos ne vije ket deuet a-benn hep bezañ eilet gant e wreg.

A-boan diskennet eus ar c’harr tuet er bali e-kreiz ar vered ramzel, setu ni pilet gant an dour bannet eus an neñv. Plijadurioù miz meurzh.
Ur baouezenn a ro tro d’an holl da vont da deurel ur bozad dilennoù roz war an arched.
Kenavo er bed all !
Mab ha mab bihan ouzh on stardañ war glebor o dilhad. Daeroù en o daoulagad.
Diaesat ha diziouerusat glac’har.

Estrenion a ya pep hini diouzh e du beuzet e gouloù an oabl louet, a gammedoù lezirek war draezh glep an alezioù.
A bep tu dimp en em led ar gêr divevenn, dianav.

Piv oamp ?