Dre be wir e varnan me un den ?
Skañv an elfennoù a zo e’ m c’herzh.
Ne denn a-wechoù nemet d’ un emzalc’h,
d’ un nebeut frazennoù,
d’ un doare da lavarout.
An doare lorbus-se da gomz.

A-walc’h da ‘m lakaat da bellaat diouzh tud speredek,
brokus a hent all,
nemet peogwir ez eont gant ur c’hoari a varnan diziles,
na petra ‘ta.
Diaes din asantiñ ouzh savelennoù un nevid,
un touell evidon,
steuziadur an niñvañ,
ren ar sodelloù,
dizenelezh.

N’ on ket madelezhus.
Eus ar priziusañ,
eus an estlammusañ on gwarizius.
An techoù a dremenan da dud ‘zo
n’ int ket avat eus ar seurt sioù a ra eus an dud mistri,
dister, ha koulskoude otus.

Follentezioù brokus ez eus
ha reoù marvus,
divent,
paour,
da vastañ ouzh ezhommoù pizh un den
a ziviz piv zo dellezek a vezañ.

Steuziet ar politikaat ne chom nemet hiniennoù,
chas tasmant a hent ur bed aet da ouez,
pep preder war dec’h dirazo.