Ar vuhez gwezhiat, ar gwezhiañ, a c’hoarvez evit Hannah Arendt eus labourat, oberiañ ha niñvañ.

Petra a c’hoarvez gant labourat ? Debriñ zo beveziñ, distrujañ ar boued. Debriñ a ran evit adtapout gremm da labourat, ha labourat a ran evit kaout boued. Kelc’htroek eo arvez bevedel gwezhierezh mab-den, adkregiñ a ra heñvel. Bevañ a ra an den, genel, ober bugale, mervel.

Prientiñ ur meuz avat zo un oberiañ, lakaat er bed un oberenn, seveniñ ur c’halvezad dieil. Aesoc’h e vefe din debriñ geot en ur prad evel forzh peseurt buoc’h.

Pediñ tud ha lakaat ar meuz war an daol zo niñvañ, degas d’ an dud un egor liessek dre hanterouriezh ar meuz a zo ennañ kalz muioc’h eget ar boued lakaet e-barzh, kalz muioc’h eget istor, stuzegezh an dud o deus degaset din ar rekipe, ar jestroù, ar binvioù, an danvezioù, treuzfurmet ganin en ur meuz resis, anavezet ha kaset a zen da zen, a remziad da remziad ken ma krou ur padelezh, un amzerelezh padus gantañ frond ar beurbadelezh, an istor.

Er meuz eo endalc’het liessegezh an amzer, eus prientiñ ar boued, betek ar mare ma vo rannet etre an dud a zebro hag a zistrujo ar meuz en e alvezelezh.
Gwezhiañ an den zo bepred war un dro labour, oberiañ ha niñvañ, beveziñ, sevel ur c’halvezad, hag e lakaat er bed dirak an denion.
Anat ez eus furmoù kamm evel lonkañ ur voestad chokolad, pe korvoiñ labour ar re all, pe arvestiñ ouzh an denion ha chom er-maez eus an niñvañ.

An den avat a zo e oberioù war un dro labour, ober ha niñvañ.
Marteze eo gwir evit kement buhez a zo war an douar.