Kroget ‘m eus da lenn ul levr pa gave din e oa ennañ anv eus lennegezh, mojennoù ha marvailhoù. Souezhet on o welout en deus an aozer dastumet ur c’hementad anaoudegezhioù evit o lakaat da dremen dre vilin ar c’hravezioù hag ar bredelfennerezh.
Hañval a ra ne c’hell al lennegezh bobl nemet bezañ un heklev d’ar gwengeloù ha d’al lennegezh vourc’hiz, ha bezañ dezrannet diouzh kealiadurezh trec’h hon amzerioù gwak.
Pendudenn al lennegezh bobl teodel zo un den er stroll, un ezel eus ar gevredigezh
ha n’eus ket anv anezhañ el levr a lennan diwar ar pezh ‘m eus lennet betek bremañ. N’eus anv nemet eus haroz ar gwengeloù hag ar c’hravezioù a zo un dudenn dreistnatur, un doue pe un haroz doueel. Haroz ar bredelfennerezh hag al lennegezh vourc’hiz, kenderc’had hon stuzegezh kenderc’hañ/beveziñ, zo eñ un hinienn dreist, un trec’her a ranko ar re all sentiñ outañ evel ouzh un doue.
Penndudenn ar Sorbiennoù n’eo ket un haroz er ster a gaver el levr-se hogen un den en ur gevredigezh, ha ne vefe ket anezhañ hep ar gevredigezh-se
Tudenn al lennegezh teodel pobl zo un den dizanv. Forzh pe zen e c’hell bezañ. Bevañ a ra e vuhez hep stadoù askre, hep kasoni, ne glask nemet astenn e zenelezh, e lakaat da vezañ. Emañ war un dro e gwerc’helezh ar bed hag en hollveziadelezh. Diwar bleustr uvel e zenelezh e bar e selloù war ur vuhez kaeroc’h.
An haroz kinniget gant ar c’hravezioù hag ar gwengelouriezhoù a arouez an denelezh. Ur goubarad distaget mik diouzh tud ar bobl eo. N’eo ket mui un den boutin a grog gant pleustriñ e zenelezh. Ur skouer eo d’an den boutin da heuliañ, da brederiañ warnañ. Ret d’an den tennañ d’an haroz. Ne vez ket mui anv eus an den evel m’emañ en e zaelerezh denel. An den a zlefe bezañ eo, sentus d’ur patrom aet da zoue, na c’hello bezañ tizhet nemet gant tud stuziet, ampart. An denelezh zo bet lakaet er-maez eus an den
Haroz al lennegezh vourc’hiz zo aet da hinienn hollc’halloudus. Aet eo da zoue, d’un den dreist d’ar re all, skouerius. Ar gwir en deus da ren war an dud all peogwir en deus donezonoù heverk. Doue eo e unan, en em reiñ a ra gwirioù doueel war ar yoc’hoù distuz. An denelezh zo deuet da vezañ arbennigiezh un nebeut tud lorc’h enno.
Le héros aux mille et un visage, The hero with a thousand faces, Joseph Campbell, J’ai lu, 2010