Bugale fall.
Reuz ha freuz, komzoù goullo ha farsadennoù ponner sed lod ar ganfarded, ur bagad krennarded c’hwen en o loeroù. Unan a babor, un nebeut a heuilh, ar re all a dav dindan ar barrad.
Petra a eskoro eus seurt bourbouilh distumm ?
Hag e veuzint er bed a nagennont ?
Hag e kavint o hent en ur bed diroll ?
Hag e kano ster dezho ur yezh na gomz ket o c’herent ? Yezh ar skol ! Yezh ur c’helenn tidek hag arzaeladus evel pep kelenn.
Azon diaesterioù an oadourion da zegas kened er bed ha d’ o bugale.
Hag e vo strujus o birvilh ? Hag e taolo frouezh o had drant, laouen ha dibreder ?
Hag o entan a yelo da ludu ?
Ha ne vint nemet kendalc’herion sentus ur bed strizh ha dister ?
Penaos e kavint hent ar gened, pleustr ar rezid ?
Hag e vint bac’het e roued yezh albac’henn an hejerion vannieloù o emskiant reuzeudik ?
Hag e vint saverion ur bed brokus e livioù splann ?
Hag e vint o dazont ?
Den ne oar.