Gant un ober frammet e talvez barregezhioù an hiniennoù da binvidikaat ha da ledanaat al labour boutin. Pep hini a zegas e bleustr hag a dalvez dre e labour da wellaat ar binvioù labour.
Hiniennoù liesseurt a c’hell kenvezañ ha diorren, resisaat amkanioù, ha dreist holl diorren binvioù dezrannañ spis.

Pa solier war liammoù etrehiniennel al labour zo e dalc’h heñvelderioù. Kouezhañ a ra an dezrann, ar binviadur boutin, e gounid al lorberezh, ar c’hantaezañ, an angerzh.
Fiziout a reer en dud diouzh o gorre, diouzh ar pezh a weler anezho ha diouzh an hegarat ez int ganimp.
Ne c’heller ket komz a genlabour en degouezh-se hogen a vignoniezh.
Ar vignoniezh zo ur stern daveiñ deurus, plijus, hetus.
Merzet ‘m eus avat ha ne oa ket diziouerus bezañ mignon gant an dud a genlabourer ganto d’ ober labour mat.

An darempredoù deurusañ ha plijusañ ‘m eus bet zo bet dre genlabourat ha n’eo ket dre lipat banneoù. N’eo ket lavarout ez eo ur skoilh d’al labour diskenn banneoù bier gant kenlabourerion.

Diziouerus eo kaout an tro da zezrannañ al labour graet a-gevret, pezh na c’heller ober nemet dre ziorren binvioù. Gant darempredoù etrehiniennel e teu da vezañ dic’hallus dezrannañ al labour graet gant pep hinienn en un doare a vo sklaer evit pep hini, pep hini o chom gant danvez binvioù dister ha dreist-holl hiniennel.
Al liamm etre an dud en amzerioù-mañ zo ur vouilhenn difetis, diresis, elfennoù a bep seurt orin o neuial e-barzh, ur santimant breizhek na ouzer ket resis petra eo.
Eztaol kudennoù ar gevredigezh c’hall n’ eo ken.

Ne c’heller fiziout nemet war ul labour renet a-gevret gant an dud evit krouiñ, mont war-raok, ha n’eo ket war doareoù pep hinienn na begen plijus ha seven e vefent.