Eus al lec’h diwezhañ ma oa bet o labourat he doa degaset din ur voutailhad kognag.
Netra war ar skritell nemet COGNAC V.S.O.P.

Al liñvenn enni oa ganti ul liv aour kozh, teñval, dour-boull heñvel, ragarouez kevrinus.
Un drugar eo bet, plijadur al lagad, estlamm ar fronelloù, flouradenn an alkool tener.
Plijadur ur pok don gant un den a garer, ur pellaat diouzh kement trubuilh a zo er bed, ar baradoz war an tamm douar-mañ m’on bet kaset gant trepetoù ur vuhez dinoaz, divrud, distan.
Bez e oa unan eus an traoùigoù dister-se a laka da dremen holl drubuilhoù ha sotonioù ar bed, disterded an holl dud-se hon c’hemer ni an dud sioul evit sodion.

An heol e kreiz ar goañv a ra goap ouzh an deiziadur, ouzh keleier goullo ar skinwel.
Gant an died-se e oa peadra da vevañ hep tredan, hep ur pellgomz gra-pep-tra, hep helosk na garr.
Na gaer ez hañvale ar bed, na soutil ijin mab-den a-greiz-holl.
E lec’h ma ne welen nemet ur bagad azened edo skoachet a vil vern tud soutil, tud barrek da selaou, da brofañ kement a draoù prizius a virent kuzhet mat dindan ur sotoni pemdeziek.
Trugarez da saverion alkool bro Kognag. Eus o labour pemdeziek ez eskor arz ivez.