Kaset a gleiz da zehou,
droug er c’higennoù,
skuizh va fenn,
bresk va eskern,
e dalc’h an avel.

E-dalc’h an trouz,
trouz diastal,
paouezenn ebet ken,
a veure da noz,
kalvezouriezh an drailhañ kaozioù,
goullo ar gefred,
aner klask stlenn er sarac’h peurlivet,
leun-barr,
studiet piz,
frailh ebet,
taolet a vrec’hiadoù ledan,
glav pilh.

Diviet on,
uzet,
berr va anal,
war var da fatañ.

Nemet un digor,
un ode,
gourzhtreiñ ar gerioù
bannet ouzh va fas,
lezel ar sonerezh da zont,
ur chuchumuchu
e korn an arnev.